لعنات

يلعن الشاعر عالمشاعر و الساعة اياها و يلعن اللاعن عال ملاعن مش نقصاها! يعنى الامر عجيب...

خلونا نقول... ناس ماتقدرش تعيش معاهم و لا تقدر تستنى بلاهم و رغما عن كل ده... شايل  قرفهم و تعبهم و بلاهم بس لا مؤاخذه الجزمة لا مؤاخذة فى بقك و لا مؤاخذه الليمونة عاصرها على نفسك و مستحمل... طب ليه؟ يعنى مش كفايه عليه همى اللى فايض منى و باظظ و ان كنت فاكر ان كده كتير خد عندك هم اهلك و هم اصحابك و هم شغلك و مراتك و وولادك لو كان فى و هم الحاره عالشارع عال بلد علي و عليكو , و عاللى يتشددلنا احنا التنين. و اخر النهار يطلعلك مشروع انسان ربنا يسامحه  ينغص عليك عيشتك بكلمة اوحركة و اللى البطحة على راسه اهو بيحسس... و اللى كافى خيره شره اهو ساكت لا بيه و لاعليه. يعنى محدش قلبه عليك؟ حتى اللى طلعنا بيه اهو طلع قرعة و الصلعة لامعة. لكن الواحد بيقول معلش... مهو لولا الطالع اللى فى النازل و الهابط اللى فى الصاعد كان رسم قلبى اتعدل بس كنت ابقى ميت. و يجى بسلامته ساعتها يبتسم فى وش اهلى و يقول " الحمد لله... العملية نجحت بس للاسف المريض مات."